صعيدي فى الجامعه(متجدد بإستمرار)

لسلام عليكم ورحمة الله وبركاته

انا حنقلكم النهاردة حكاية احمد "الصعيدى" مع نور "البنت الاستايل"

اولا التعريف بالبطل :احمد ولد الحاج هريدى
واحمد ده يا جماعه لسه جاى من الصعيد طازه
(ممنوع الزعل لكل الصعايده)



الحلقة الاولى

احمد: لو سمحتي حضرتك...ممكن براية
نور: ههه
احمد ضرتك بتضحكي على ايه ممكن اعرف يعني لو سمحتي
نور : مش عيب شاب في سنك يطلب براية ..ده احنا في جامعة
احمد : طيب معاكي شفرة...عشان المحاضرة هتبدأ خلاص
نور : ايييييه..ايه شفرة دي..ممكن تسكت لو سمحت
احمد : حد معاااااااه براااااااااية....او قلم زيااااااادة..ردوا
نور: انت اكيد مجنون وطي صوتك الطلبة كلها بتضحك عليك
احمد :ويضحكوا ليه ولاد الدزمة دووووووووول
نور: خلاص خلاص انا هنقل المحاضرة وبعدين اديلك تصورها
احمد : بس انقلي كويس ..وياريت تنظمي الكراسة



(اثناء ما المحاضرة شغالة ونور شغالة كتابة واحمد هيموت عشان مش معاه قلم)



احمد: يا انسة خطك زفت زفت..انتي مش مسطرة الصفحة ليه ...وفين التاريخ الهجري .يادي النيلة عليا وعلى الجامعة
نور : انت مالك ومال خطي مش كفاية هديلك تنقل مني وهتعطل انا
احمد : ليه وانتي عربية اصلك علشان تتعلطي..هما البنات متعطلين خلجة
نور : انت انسان قليل الادب...بجد مش بتعرف تكلم البنات ازاي
احمد : لأ يا شيخة والنبي المرة الجاية تبقي تجيبيلي الكتالوج بتاعك



(نور عشان رقيقة سكتت ومش عرفت ترد على بجاحة احمد وانتهت المحاضرة )



اثناء خروج الطلبة من المدرج...احمد حب يستظرف بس بطريقة غبية شوية
احمد وسط حشد من الطلبة بنات وولاد
وكأنهم قطيع من المواشي
هررررررررررررررررررر...وضحكته سمعت كل اللي ماشي



(نور بتحكي مع زميلتها من كلية تانية على احمد )



نور : بصي يا هالة الولد ده....فضيحة فضيحة يعني...وحكتلها على اللي حصل
هالة : تلاقيه شاب تحفة...مش باين عليه استايل خالص..ده لابس بدلة وكرافت
نور : بس تعرفي شكله وسيم اووووي...حاسة انه طيب وعلى سجيته
هالة :اوووو...ده وسيم؟...ده مش حاطط نقطة جيل على شعره حتى..شعره منعكش جدا
نورا ستي سيبك
هالة: على رأيك



خلص اول يوم في الجامعة وقبل النهاية بدقايق



احمد: يا استاذة يا انسة فين المحاضرة عايز انقلها هاتيها يلا يلا بسرعة
نور : تنقل ايه يابني دي عشر ورقات غير في رسومات وجداول
احمد :ومالهم يعني عشر ورجات انتي هتخلفي وعدك ولا ايه
نور : انا مقلتش كده بس في حاجة اسمها تصوير..اسرع يعني
احمد: هه اصور ايه بخطك الزفت ده..شوفي ...زفت
نور: حقيقي انا غلطانة وكلام هالة باين عليه صح...بعد اذنك..اوف



سابته ومشيت .....وقال



احمد: عليكي يا شيخة وعلى هالة وعلى الجامعة كلتها....وبرضه خطك زي الزفت



عاوزين تعرفوا اليوم اللي بعده حصل في ايه
تابعوا معايا بقى قصة حب احمد الصعيدي ونور البنت الاستايل
__________________

الحلقه الثانية



وجه اليوم التاني....ولسة الحياة الجامعية لم تؤثر على تلاميذ الثانوية العامة...بس مع بلدياتنا احمد ...ماشية عكس خالص...مش عارف يتأقلم عليها
وتعالوا نشوف الايام والحياة الجامعية هتعمل ايه في احمد وهيتعامل معاها ازاي
كان ميعاد المحاضرة الساعة 8 صباحا...كان احمد واقف قصاد المدرج من 6 الصبح مش عارف ليه ونبتدي الحلقة التانية يا جامدين


احمد:ديب ديب ديب انتوا يا ناس يللي هنا...افتحوا الباب
الساعي : يا فتاح يا عليم يا رزاق يا كريم
احمد: ماترش ميا يا راجل قصاد المدرج عشان تستفتح
الساعيا كابتن المحاضرة لسة الساعة 8 مفيش دخول دلوقت
احمد:هدخل يعني هدخل..عليا النعمة هدخل هاااا
الساعي: قفل الباب في وشه ودخل جوا
احمد ا ابن الدزمة انت هتضيع عليا المحاضرة شكلك
احمد: اما اروح اجيب كوباية شاي سخن مولع
الراجل: تؤمر بأيه يا فندم
احمد : شاي خمسينة بنعناع
الراجل: ايه ايه...مفيش نعناع
احمد: ومفيش نعناع ليه
الراجل : هو كده مفيش نعناع على الشاي ..النعناع لوحده
احمد يب هات نص كوباية شاي ونص كوباية نعناع
الراجل: خد فلوسك اهي
احمدب والشاي ابو نعناع فين
الراجل:اوووف
احمد:اوووف على دماغك...ابن دزمة صحيح


كان فات حوالي ساعة ونص وهو واقف في الكافتيريا عشان يشرب شاي
قرر انه يرجع للمدرج عشان يلحق مكان وبالفعل حجز مكان وخرج تاني عشان
يجيب شاي من كافتيريا تانية...ونجح انه يجيب المرة دي ..دخل المدرج وفجأة
لقى مين اعد مكانه ...مين مين مين....لقى نور فارشة كل حاجتها وبتشرب كابتشينووووووووووووووووو

احمد : بصوت لا يطاق....ايييييييييه ده يا هانم...هي وكالة من غير بواب
نور :وطي صوتك من فضلك انا بتكلم بهدوء وبأدب
احمد:هي دي طريجتي..عاجبك ولا مش عاجبك
نوريب انا مش هقوم
احمد: هروح للعميد يجي يقومك
نور:ههه
احمدتضحكي على ايه يا باردة
نور: لم نفسك
احمد: شايفاني مبعتر في الارض ولا اييييييييه
نور: مش هتحضر...هههههه
احمد ليا الطلاج لأحضر غصب عنك وعن عين والدك....


وفجأة سمع صوت الدكتور بيناديله


النهارده جتلكم بالحلقه التالته والرابعه لعيووون الاعضااااااء
بينا نشوف اخوناا احمد واختناااا نووور ههههههه

الحلقه الثالثه



وقف الدكتور بكل ثقة...وبص على الطلبة كلهم
من بين كل الطلبة وقعت عينه على احمد وهو مكشر
الدكتورالك يابني مكشر من اول السنة ليه كده
احمد و سمحت معاك نمرة ماحمول العميد
الدكتور : ههه ايوة ليه
احمد : عاوز اقدم شكوى في البت دي
نور تقولش بت
احمد :هجول بت وستين بت كمان قومي يلا
الدكتور : بس بقى اخرس شوية يا اما هطردك
احمد : انا ...تطردني ليييييييه هاتلي مكان سعادتك
الدكتور : تعالى اعد جنبي هنا على الكرسي ده
احمد : وااه...اجعد جنبك مرة واحدة يا داكتووور
الدكتور :ايوة تعالى

وهو نازل راح وقع الكتاب بتاع نور ورمى اقلامها
راحت نور ضربته على ضهره..قال ااااااااااااه
وصوته سمع المدرج كله والكل فضل يضحك عليه


الدكتور : اطلع برا يلا...مش هتحضر المحاضرة
احمد : ابوس ايدك يا بيه انا امبارح مكتبتش والنهاردة محضرش...مين يرضى بكده يا ناس
وهو خارج رمى عينه على نور ولمح فيها نظرة عطف جميلة

بعد ما المحاضرة انتهت...نور خرجت لأ حمد

نور جد انا اسفة اوووي
احمد : على ايه بقى ما المحاضرة خلاص
نور : خد المحاضرة بتاعتي انقلها وانا هستناك
احمد : بجد بتتكلمي بجد
نور : ايوة مع انهم اكتر من عشر صفحات بس هستناك
احمد : متشكر يا مازمازيل نورة
نور : لأ قول نور بس احنا اصدقاء وابتسمت ومشيت

احمد عمال ينقل وعمال يقول في سره...خطها زي الزفت
بس شكلها طيبة جوي....الخط مش كل حاجة في الانسان يعني
احمد لمح نور وهي جاية وبتبتسم بخجل

==================================

الحلقه الرابعه


بعد ما الدكتور طرد احمد من المحاضرة بسبب نور
وخرج خالص ونور صالحته وقالتله خد المحاضرة انقلها
واثناء ما كان بينقلها وبيقول خطها وحش بس هي طيبة كانت هي جاية بتبتسم

نور : احمد انت خلصت المحاضرة
احمد : لأ لسة انا في اول صفحة مش عارف اجرا الكلمة دي
نور قرت الكلمة
نور : اوكي كمل انا هستناك
احمد ا لا انتي لازم تروحي دلوقتي عشان انتي اتأخرتي خالص
نور : طيب والمحاضرة
احمد : تتحرج المحاضرة
نور ضحكت ضحكة رقيقة جدا حركت احمد الاسد
احمد : ممكن اوصلك لحد الباب...والله لحد الباب بس
نور : اوكي اوكي مفيهاش حاجة اتفضل
احمد : انتي في الجامعة هنا من امتى
نور :ايه يا احمد انا في سنك لسة اول سنة
احمد : انا عارف انا عارف
احمد : وياترى دخلتي هنا واسطة ولا ايه
نور : هه ...احمد مالك في ايه
احمد : لا بهرج معاكي
نور : تعرف انك
احمد :اني ايه
نور : طيب اوووي
احمد : وانتي انسانة محترمة اه فعلا محترمة بجد
نور : ميرسي
احمد الهوي ياني انا منجلتش المحاضرة بتاعت النهاردة
نور : ميرسي يا احمد على التوصيلة الجميلة دي منك
احمد : انتي رايحة فييييييييييييييييين
المحاضرة
المحاضرة
المحاضرة
وووووووونشوفكم الحلقة الجاية ان شاء الله ومع يوم جديد من ايام الجامعة
و احمد ونووووور


وانتظروااااا يا أحلى شباااااااب فى الدنيا الحلقة الجاية

علشان الدنيا هتتظبط مع احمد خاااااالص


وزاي ما وعدتكم يا احلى اعضاء في الدنيااااا ان الحياه هتتظبط مع احمد
تعالووو بينااا من غير كلام كتيرررر

يلااااااااا بسررررررررعة على الحلقة الخااااااااامسة والسادسه كماااااان



احمد مأجر شقة مفروشة وساكن فيها فترة الدراسة....
ظبط المنبه بتاعه على ميعاد الجماعة جرس الباب بيرن...بيرن...خبط جامد....
احمد قام مخضوض وبيفتح الباب وووفجأة هاي..انا جارتك اللي ساكنة قصادك





احمد : طيب وانا اعمل ايه يعني جارتي ولا مش جارتي
تؤ...طيب قول صباح الخير..قول صباح النور..قول صباح اللي بتغني
احمد : يا فتاح يا عليم يا رزاق يا كريم...يادي النيلة ..انتي عاوزة ايه مني دلوقتي
انا ؟ ؟
احمد : امال امي
تؤ تؤ انت عصبي كده ليه...كل شئ بالتفاهم وبالهدوء...اعملك نسكافيه يهدي اعصابك
احمد : متشكر يا ستي متشكر خالص انا...عاوزة ايه مني على الصبح كده انا ورايا جامعة ايه ده .
.انت بتروح الجامعة...انا بفتكرك في المدرسة
احمد : صبرني يارب صبرني ...جولي عاوزة ايه هتأخر على الجماعة
عندك حبة شطة
احمد : هاا...جلتي عاوزة ايه شطة
شطة....اللي بتخلي الاكل يوحوح
احمد : لا انا مش بحب اوحوح عن اذنك...وقفل الباب ولبس بسرررعة ونزل ركب الاتوبيس
احمد : الاجرة بكام لو سمحت يا اخينا رد شابستايل...ه ايه اخينا دي دي كلمة قديمة موت
احمد : ماشي يا عم الجديد....بكام الاجرة
الكمسري جنيه وبريزة يا كابتن
احمد : اشمعنى وبريزة
الكمسري : حكومة تقدر تتكلم
احمد : خد يا عم ونزلني عند الباب الرئيسي
احمد داااااااااخل بيجرررري....وهووووووب...خبط في بنت وقع عليها العصير انت غبي ...انت مبتشوفش
احمد :هشششششششششش انت قليل الادب مش محترم كمان
احمد : هسسسسسسسسسس
احمد : انا ورايا محاضرة مش فاضيلك انا خدي منديل اناهوريك انا لازم ابهدلك يا عمرو يا وائل يا هيثم
عمرو : مالك بيها يا تحفة
وائل : انت لازم تتربى كويس
هيثم : مش هتروح سليم النهاردة نور لمحت الخناقة من بعيد
نور : احمد احمد في ايه
احمد ابعدي انتي يا نور ده تار قديم وهيخلص النهاردة
نور : احمد دي جامعة انت ممكن تتفصل
احمد : ومحضرش محاضرات تاني ؟
نور : ايوة ايوة انا هروح انده الامن
احمد : تندهي الامن يشيلوا جستي ولا ايه
وفجأة الامن جه والمشكلة اتحلت والحمد لله احمد خرج سليم مع انه كان ادها وادود يعني بس خاف طبعا على مستقبله
احمد : متشكر يا نور جوي
نور : ده اقل واجب يعني
احمد : انتي عملتي الواجب صح
نور : واجب ايه يا احمد هو احنا في مدرسة
احمد : ههه اصلها فاكراني في المدرسة
نور : هي مين دي
احمد : اللي عاوزة الشطة
نور : انا مش فاهمة حاجة يا احمد
احمد : انتي بتحبي توحوحي
نور : هههه
احمد : هههه
نور: تعرف يا احمد ان دمك خفيف اوي
احمد : ربنا يخليكي انا مش بجدر على الكلام ده
نور : هو انا قلت حاجة يا احمد
احمد : ايوة دمي خفيف وحلو ومسمسم والكلام الكابير ده
نور : ههههههه
احمد : بتضحي على ايه عاد
نور : ههههههه
احمد : يوه يوه يوه
نور : المحضارة هتبتدي يا احمد يلا نحضر
احمد : ماتيجي نتمشى شوية في الحديقة وبلاش المحاضرة
نور : بجد ...طيب يلا
احمد :ال حديقة ال....يلا يا هانم نلحج المحاضرة انا حاجزلك جنبي احمد دخل لقى اتنين اعدين مكانه هو ونورووووووووووووووووووووووووووو
ده الجزء الأول لسه في باقي لو عجبتكم أنتظروا المزيد

ههههههههههههههههههههههههههههههههههههه
جاااااااااااااااامده طحن طحن طحن
بس انتى المفروض كنتى تخلصيها انهارده
هههههههههههههههههههه
يا بنتى بالراحه سته حلقات فى يوم واحد
ههههههههههههه
يالا حلو اوى النشاط ده
ميرسى كتير

صراحه مش قرييتها لسه طويله اووووووووي
بس بعد الامتحانات اوعدك اقراها
ههههههههههههههه
مش تنزلي بقي الا لما نخلص انا وبوسي احنا موقفين الحلقات كلها لبعد الامتحانات
بس انتي ماشاء الله يا لافلي
عامله مواضيييييييييييع جمييييييييله من يوم ما نورتينا في المنتدي

ميرسي أوي ياسيكو ويا كيتي الجزء الثاني جاهز بس زي ما تحبي مش هنزله إلا لما تخلصوا إمتحانات

ست اجزاء مرة واحدة
ايه الافترا ده
اول مرة اشوف حد عايز يخلص القصة بتاعته بسرعة
ههههه
ومستنيين الحلقة الجاية او الحلقات بعد الامتحان

هههههههههههههههههههههههه
جامدة جدا

جميل والله المجهود ده يا لفلى

ههههههههههههههههههه
حلوة جدا يا لوفلى
ومستنية الحلقة الجاية ما تتاخريش علينا

عليا الطلااااج لازم اتابعها
ههههههههههههههه
حلوة اوى يا لافلى
استمرى استمرى

كيتى مين يا عم سيكو
لووووووووووفلى
انتى فين يا بنتى؟؟؟؟؟؟؟؟؟؟

هههههههههههههه
انا شارب سيجارة بنى
هههههههه
سورى هعدلها اهو

يلا بقى يا لاااااااااااااااااافلى

لافلى ان شاء الله هتحطها النهاردة

يااااااااااارب

ميرسي يا جماعة علي المتابعة

الحلقه التامنه





وبعد ما احمد خلص امتحانات هو ونور وقرر انه يطلع الرحلة وكان ميعاد الرحلة اتحدد

نور : هو احمد اتأخر كده ليه

ريم : انتي مالك مش على بعضك ليه

نور : وانتي مالك

ريم : مش عارفة مهتمة بواحد زي ده ازاي

نور : ملكيش دعوة بقى

ريم : صحيح عملتي ايه في العريس اللي اتقدملك

نور : رفضته طبعا..انا لسة مش عاوزة ارتبط دلوقتي

ولسة الاتوبيس هيتحرك كان احمد وصل ونور تنفست الصعداء

احمد : ايه يا جماعة انتوا كنتوا مستنيين حاجة ولا ايه

ريم : ابدا كننا مستنيين القطر

احمد : هو احنا هنسافر في الاتوبيس ولا الجطر

ريم : يااااربي

نور : ه جامدة دي يا احمد

احمد :اي خدمة يا نور ابقي تعالي كل يوم

نور : اجي فين

احمد : لا لا متاخديش في بالك

والكل ركب الاتوبيس وفجأة احمد بيطلع من شنطته طبلة كبيرة

وشغال ضرب عليها لحد ما وجع دماغ الناس كلها والكل زهق منه

احمد : ايه يا رحلة فقر مالكم ساكتين ليه محدش بيرجص ليه هطبل وهرجص في نفس الوقت ولا ايه

نور : ابدا يا احمد بس الطبلة صوتها عالي اووووي

احمد : مانا عارف ان صوتها عالي...مكنتش اعرف انها هتضايقكوا كده

نور : عامة انا مش مضايقة انا مبسوطة بيها


وفجأة احمد بيطلع من شنطته زمارة كبيرة بتاعة الفرق الشعبية

وفضل يوجع دماغ الشباب كلهم بأصوات الالات الموسيقية الغبية دي

وفضل على هذا الحال لحد ما وصلوا

احمد : يا بووووي يا جدعان المنطجة هنا جامدة جوي جوي

نور : انت اول مرة تيجي هنا

احمد : لأ جيت قبل كده ايام الحرب

نور : حرب ايه يا احمد ..هو انت حضرت حروب

احمد : هو احنا هنروح امتى يا نور

نور : يعني لسة اسبوع...انت زهقت ولا ايه

احمد : لا لا خالص بس انا مجبتش اكل كفاية

نور : احمد اكل ايه بس هنا الاكل اوبين بوفيه

احمد : يعني ايه

نور : يعني تاكل اللي انت عايزه

احمد : يالهوي ياجدعان دنا ههيص جوي جوي

نور : انا هطلع اغير بقى

احمد : اوعي تجولي هتلبسي المايوه بتاع العريانين ده بتاع البحر

نور : هه ايه يا احمد ده بس

احمد : صدجيني معرفكيش تاني

نور : انت هتنزل البسين بأيه ...معاك ماييوه

احمد : لأ انا ابويا جايبلي ترننج من السعودية هنزل بيه

نور : مينفعش يا احمد

احمد : بجولك من السعودية ..جامد جوي جوي بجولك

نور يب يلا نفطر بقى عشان جعانة

احمد : انتي على طول جعانة كده

نور : ه انا بحب الاكل اوي

احمد : انا اخر حاجة افكر فيها الاكل

نور : يعني مش هتفطر

احمد : في مش وخيار وعيش بلدي

نور كانت عاوزة تقوله ده عند الحجه الكلام ده

اول لما عرف احمد ان الاكل ببلاش قال انا جعان اوي اوي يانور

احمد : كل ده اكل يا نااااااااااس ...هيخلص امتى ده بس

نور : كل على اد ما تقدر يا احمد

احمد : عليا الطلاج انا هاكل وكل لحد ما افرجع كده

نور :انا طالعة اغير ونازلة

احمد : تغيري ايه بس يا شيخة بصي على نفسك في المراية وشوفي الولية دي


يابووووووووووووووي انا لازم اروح اتعرف عليها دي لابسة استرتش جاامد جوي جويـــــــــــــــــــــــــــــــــــــــ

الحلقه التاسعه


أحمد شاف الوليه ام مايوه اتجنن عليها راح رايح وراها

واختفى من قدام نور فى ثوانى

أحمد: ايه يا وليه المايوه الدامد ده وايه الشياكه دى كلها
الوليه: ايه الاشكال البيئة دى
أحمد: بيجة ؟ طب والله انتى اللى بيجة ومعفنة كمان وريحتك منتنه وشكلك من اللى بيستحموا من العيد للعيد
الوليه: تصدق بقى لو مسكتش انا هندهلك اللى يعرفك شغلك كويس
أحمد: ههههههه هتندهى مين يعنى بالمايوه اللى انتى لابساه ده
الوليه: لا دا انت قليل الادب ومش متربى وعايز اللى يربيك .. وبعدين ايه كلسون دى وفين هو اصلا؟
أحمد:اه جولى كده بقى ان انتى من الاول عايزة تعرفى معناها وعماله تتوهى فى مواضيييييع تانيه اه يا لجيمه
الوليها تااااااااامر يا أدهاااااااااااااااام
أحمد: يطلعوا مين ان شاء الله سى تامر وسى ادهم دوووول ولادك العفاريت الصوغنانين ولا الكلاب البلوكسر بتوعك
الولية: بلوكسر ههههههه
أحمد: بتضحكى على ايه يا وليه دلوجيت
الولية: ( ولية ) انا هعرفك دلوقتى على قلة ادبك والسفاله اللى انت فيها دى
أحمد: طب والله انتى بوج على الفاضى
.. بسم الله ماشاء الله على تامر وادهم وهما رايحين لمامتهم كل واحد فيهم عامل زى السوبر جيت ..
تامروادهم: ايوااااااا يا ماما كنتى بتندهى علينا
الولية: ايوه ياحبايبى الكلب ده كان عمال يقل ادبو معايا وقال عليكوا انكوا عفاريت صوغنانين وكلاب بلوكسر
تامروادهم: انت قولت كده علينا يااااااااااااد
أحمد: عليا الطلاج ما حصل الكلام ده يا عم البلدوزر انت وهو كل اللى حصل انى كنت بجولها الساعة كام يا هانم
مامة تامر وادهم بتوجه الكلام لأحمد بس بحنيه زى ما انتوا عارفين
الولية: هانم اه يا كداب دى عمرها ما طلعت من بؤك خالص ليا يا عديم النظر
وكمان يا حبايبى كل شوية يقولى يا ولية
تامروادهم: احنا ماما يتقالها يا ولية دا انت هتموت النهارده
أحمد: يا رداله استنوا بس كده واهدوا طب انا هجول ايه اللى حصل
تامروادهم: واحنا هنستناك لما تحكيلنا ايه اللى حصل يا عم الكتكوت وبعدين ايه برطمان الكاتشب اللى انت واقع فى ده
حد يلبس بنطلون احمر
أحمد: لو سمحت يا أخ متقولش كتكوت دى وبعدين انت عندك عمى الوان ولا ايه
تامروادهم: انت كمان بترد على اخويا دا احنا هنعملك شمسية
أحمد : يااااااه عليكوا هو الواحد ميعرفش يهزر معاكوا كده اااابدآآآآ
نور: أحماااااااااااااااااد
أحمد: ايوم يا نور انا هنا واقف مع ناس صحابى
تامروادهم: صاحبك مين دول ياااااه دااحنا هنفرمك دلوقتى
أحمد: لأ والنبى يا كابتن اصلها البت بتاعتى ومش عايزها تشوفنى وانا بتفرم
نور: ايه يا احمد انت اختفيت مرة واحدة كده ليه وجريت ورا الست اللى كنت بتقول عليها وليه
وعملت ايه معاها بقى يا سيدى فى الاخر ... بس انا زعلانه علشان تسيبنى وتقوم تجرى وراها كده
أحمد: طب بجولك ايه دلوجتى اجرى انزلى البحر شوية وانا هحصلك
نور: لأ انت بجد عملت معاها ايه ومش تعرفنا على صحابك . انما انت مقولتليش انك ليك صحاب هنا
أحمد : ما اصل انا لسه متعرف عليهم دلوجتى
... ام تامر وادهم كانت بتجيب حاجه ورجعت لهم تانى
نور : الحق يا احمد الست ام مايوه اللى كنت بتقول عليهها جايه هناك اهيه
أحمد: يا بت اجفلى خشمك ده بدل ما اقطعلك لسانك
هه
________________

الحلقه العاشرررررررره


بعد ما مامه تامر وادهم جتلهم




الولية: ها يا حبايبى عملتوا ايه مع الكلب ده

نور: كلب ... انتى قصدك على مين يا هانم

الولية: قصدى على السافل قليل الادب اللى واقف جنبك ده

أحمد: لالالا انتى كده عديتى حدودك يا جمورة وانا مش هجدر امسك نفسى بعد كده

تامروادهم: انت بتكلم مين كده ياااااااااد

أحمد: بكلم صاحبتى يا عم الحد انت وهو

تامروادهم:ااااااه افتكرنا حاجه تانيه


أحمد جه جنب تامروادهم بصوت واطى والنبى يا كابتن انت وهو متخلوش شكلى وحش جدام الموزة بتاعتى


تامروادهم: هههههه وانت عندك موزة يا بأف

أحمد: لالالا انتوا زودتوها على الاخر انت واخوك يا عم الجمور

تامروادهم: نعم يا كوتوموتو

أحمد: بص برده تانى بتربط الهزار بالجد ياددع انا بمزح معاااااك

تامروادهم: ما علينا انجز وودع الموزة بتاعتك علشان انت هتموت دلوقتى

أحمد: لأ والنبى يا كابتن بلااااااش وانا لابس الترننجاللى ابويا الحد جايبهولى من السعودية

تامروادهم: ااااااانجز ..... طب لما انت مش اد المعاكسه والكلام ده بتعاكس ليييييييه

نور: أحمد انا مش فاهمه حاجه !!!

أحمد : استنى يا نور ... معندناش حريم تفتح خشمه ا والرداله بيتكلموا

نور: يا أحمد دول بيقولوا هيضربوك وكلام غريب كده

أحمد : يا سيتى دول بيهزرووووا معايا

تامروادهم: لأ مبنهزرش .....

الوليه: علشان لازم قلالات الادب اللى زيك يتربوا كويس ويعرفوا شغلهم


أحمد بيقرب من أم تامروادهم وبيقولها

معلش يا هانم ..متزعليش يا جمر انتى وبعدين انتى احلويتى عن جول مرة شوفتك فيها كده ليه

الوليه: خلاص يا ولاد سماح المرة دى طلع مؤدب

وبتروح مقربه من احمد وموشوشاه فى ودنه

الوليه: هستناك بكره على البيتش الساعة 10 الصبح اوعا متجيش

احمد: قشطه يا موزة من 8 الصبح هكون متلجح على البيشت

الوليه: يلا يا اولاااااااد

أحمد : سلام يا رداله بس اوعوا تنسوا

مستنيه ردودكم للتكمله القصه
يارب تعجبكم

هههههههههههههههه
احمد ده عثثثثثثثثثثثثثثثثل
جميله اوى يا لافلى
لازم تكملى اكييييييييد

الحلقة11

أحمد وهو قاعد على البلاج مستنى ام ادهم وتامر

ميييييييين اللى طب عليييييييه ..........




الوليه: ايه يا ميدو إتأخرت عليك

أحمد : لالا خالص وحتى لو إتجخرت يا جمر

الوليه : لا دا أنت شكلك شقى خالص

أحمد: لا دانا اعجبك جوى جوى

الوليه: طيب هنشوف كل حاجه

وهما قاعدين ميين اللى طب عليهم .............

الجميله نور

من غير نفس بقى ونور بتتكلم

نور: ازيك يا احمد انت هنا من بدرى ولا ايه ؟

أحمد : اه قولت اشم هوا ناضيف على الصبح كده

نور: طب تعالا معايا يا احمد لو سمحت انا عايزاك

أحمد : حاضر يا نور 5 دجايج وهكون عندك بس اسبجينى انتى

نور : لأ يا احمد لو سمحت انا عايزاك دلوقتى ممكن

أحمد علشان خاطر ميزعلش نور وعلشان هو ميقدرش على زعلها

راح قايم وراحلها على طول

نور: ايه يا احمد اللى بينك وبين الست دى ممكن اعرف ؟

أحمد : مفيش حاجه يا نور صدجينى

نور : انت يا احمد متعودش تكدب عليا كده

أحمد : وانا والله يا نور معرفش الوليه ام كلسون دى عايزة منى ايه

نور بصراحه انا فى حاجه عايز اجولهالك من زمان وكاتمها فى جلبى

من زمان جوى جوى انا يا نور .............

الوليه: ايه واقفين بتقولوا ايه يا أمامييييييير .. تعالا يا ميدو انا عاوزاك فى حاجه

وراحه شدااااااه من ايده

نور : ميدو !!!!!!!!!!!

نور : يا احمد تعالا انا عاوزاك

واحمد واقف مش عارف يعمل ايه وراحه شداااه تانى وخادتو ومشيواااااا بعيد عن نور وهو مش عارف يعمل ايه...

المهم نور كانت هتتجن ومش عارفه تعمل ايه

وبعد ما رجع احمد

احمد : يا ساتر يا رب على الوليه دى اعوذ بالله

نور : ايه يا احمد كنت فين انا كنت قلقانه عليك قوى وزعلت منك اوى برده علشان مشيت وسبتنى مع الست دى

أحمد : دى وليه مجنونه

نور: ليه كانت عاوزة ايه

احمد: كانت بتطلب حاجات غريبه كده وكل شويه تجولى انت صعيدى اى كلام ولا صعيدى جامد .. والحمد لله ان ربنا نجانى منها

نور: لا والنبى وبعدين ؟؟؟؟!!!!!!!

أحمد : مكونتش اعرف انها كده انا كنت فاكرها عايزة خدمه منى اجدمهلها ولا حاجه طلعت غير كده خالص

نور: طب على العموم يا احمد انا مش عايزاك تقف معاها تانى ولا تروح معاها تانى

أحمد: طلباتك جوامر يا جمر انت والنبى انت جمر واللى يجول غير كده يبجا دموسة وابن دموسه

نور: ههههههههههههههههه

نور: ياااه يا احمد خلاص فاضل 3 ايام والرحله تخلص ونرجع للترم التانى

أحمد : بس انا عايز اجضى ال3 جيام دول وانا معاك يا جمر وعايز اعوضك عن كل اللى فااااااات

نور: بمناسبه ايه يا احمد بتقول الكلام ده وبعدين انت مين سمحلك تقولى كده وبناء على ايه بتقوله اساسا

أحمد وشه اتقلب وجاااااب 100 لون وقبل ما يرد عليها.......

نور : هههههههههههههههههههه

نور ايه مالك انت عملت كده ليه وانا كنت بهزر معاك على فكرة

ههههههههههه

أحمد : اووووووف وه يابووووووى خضتينى يا شيخه انا قولت ايه اللى حصل .انا عمرى ما حد حرجنى كده خالص

نور: لالا متخافش كنت بهزر هههههههههه

أحمد : يااااااااه على هزارك اللى عامل زى هزار الراجل بتاع جلد الخرفان اللى بيعدى علينا كل عيد فى البلد

نور: جلد الخرفااااان

ههههههههههههههه

أحمد : يا بت بهزر معاكى دا انتى دمك زى السكر

أحمد : المهم بس دلوجتى انا لازم اتصل بأبويا الحج فى البلد واطنمه عليا يا نور احسن يكوووون جلجان عليا ولا حاجه وبعدين هو جالى قبل ما تنزل الترعه (( البسين )) اللى انت رايحها ابقا كلمنى وانا نسيت خالص

نور : ترعه هههههه المهم يا احمد

خد موبيلى وكلمه

أحمد : لا يا نور اصل المكالمه ممكن تكون غاليه شويه

نور: يا احمد ولا يهمك الرصيد كله تحت امرك

أحمد : لا يا نور دا كتير والله ربنا يخليكى ليا يارب بس معلش ولو فيها رخامه انتى معاكى اد ايه رصيد ؟ ههههههههههه

بهزر معاكى طبعا

نور: خد بقى وبطل رخامه وكلم الحج هريدى وسلملى عيه جوى جوى جوى ههههههههه

احمد : ههههههه ماشى يا سيتى بس بشرط هبقا اديكى دقيقه تتكلمى من عندى لما اجيب موبيل

نور: ااااه صح يا احمد انت لازم تجيب موبيل علشان ابقا اتصل بيك عليه بدل ما جارتك الجميله اللى بترد عليا كل مرة دى

احمد : ههههههههه لالا ما انا جولت لابويا الحج هريدى وقريب هيبعتلى الموبيل اللى بيجولوا عليه ده الموتوريله سن الفيل

نور: ههههههههههههههه

أحمد : ايه مش عاجبك ولا ايه يا بت انتى

نور : لالالا تمام

أحمد : طب هاتى الموبيل ولا انتى بتهربى من الدجيجه ولا ايه؟؟

نور: ههههه ايه اللى انت بتقوله ده امسك وسلملى عليه اوى يا احمد




الحلقه الثانيه عشر

مكالمه احمد وابوه الحج هريدى

أحمد : ازيك يابا وازى امى واخواتى والبلد كلتها

وبعدين بينه وبين نفسه (( اللهى تولعوا كلوكوا ))

الحدهريدى: ازيك يا ولدى عامل ايه وايه اخبارك مش ناوى ترجع ولا ايه يا ولدى دى البلد كلتها مستنظراااااك

أحمد: اه طبعا يابا ناوى دى البلد وحشانى جوى جوى جوى

وبعدين بينه وبين نفسه (( اللهى ارجع الاجيها مولعه باللى فيها ))

الحدهريدى : والعمده يااحمد بيسلم عليك وعايز يكلمك علشان عايز ينزل مصر وعايز يشوفك علشان تروحوا مع بعض تزورو الأوليه وبالمرة يشتريلوا بهيمتين بدل اللى ماتوا

أحمد : ماتوا من ايه يابا هو انت لسه شغال فى الزريبه عنده ولا ايه يابا

الحدهريدى: ومالها يا ولدى شغلانه الزريبه دا انا دلوجتى اترجيت وبجيت مشرف على البهايم كلتها

أحمد : طب الحمد لله يابا

الحدهريدى: طب خد يا ولدى امك عايزة تكلمك

أحمد : يابا والنبى بسرعه علشان انا بتكلم من المحمول ومش بتاعى يابااااا

وبعدين بينه وبين نفسه (( يالهوووى يابا عليك وعلى سنينك السوده ))

أم أحمد : ازيك يا ولدى عامل ايه

أحمد : ازيك يامااااا عامله ايه

أم أحمد : ليك عندى يا ولدى خبر حلو جوى جوى هيعجبك

أحمد : جولى ياما جولى ما ما انا عارف اخبارك

وبعدين بينه وبين نفسه (( اخبارك السوده دى))

أم أحمد : جايبالك عروسه انما ايه زى الجمر يا ولدى

أحمد : عروسه !!!! مين دى ياما ؟؟؟

أمه : نفيسه بنت عمك ابو همام

أحمد : نفيسه !!!!! اللى كانت بتجرى ورا عربيه الرش بتاعه النموس واللى كانت بتزل الترعه

ياما دى كانت ........ ياما دى جربانه ياما

أمه : دى دلوجتى بجت عروسه وإحلوت يا ولدى

أحمد : ربنا يسهل يامااا .. بس انا دلوجتى مبفكرش غير فى دراستى

أحمد : خلاص خلاص ياما سلام دلوجتى علشان الرصيد اللى فى المحمول ميخلصش

أمه : ايه ده يا ولدى انت جيبت محلول

وبعدين بينه وبين نفسه (( سلام بجا ياما دا انتى رغايه جوى وراح قافل فى وشها ))

نور: ايه يا احمد سلمتلى على الحج هريدى

أحمد : اه طبعا طبعا يا نور

أحمد: ياااااه يا نور لو شفتى بلدنااااااا حته من شرم كده

نور : نفسى اروح معاك يا احمد مرة واشوفها واشوف الحج هريدى ومامتك وكل اخواتك

أحمد : بينه وبين نفسه ((متشوفيش وحش))

أحمد : اااه يا نور نفسى تشوفى ابويا العمده وهو قاعد فى الزريبه أخ قصدى وهو بيبص على الناس اللى شغاله فى الزريبه

أحمد : وأد ايه يا نور ابويا مهتم بنظافه الزريبه أخ قصدى البلد كلتها

نور: هو بباك عمده طب احكيلى عن اخواتك يا احمد

أحمد : عندى يا ستى أخين وأخت

نور: واسمهم ايه يا احمد

أحمد : عواد وعبعال والبنت اسمها صابحه

نور: وسنهم اد ايه؟؟

أحمد : عواد ده حرامى أد الدنيا

نور: حرااااامى !!!!!!!!!!

أحمد : لأ يا شيخه بهزر معاكى

دا عواد عنده خمستااااشر سنه ولسه فى ابتدائى اصل بيحب الدراسه جوى تصورى !!!

نور : وعبعال ؟؟؟؟

أحمد : عبعااااااال يا عينى على عبعال ... عبعال ده تديله من فوق اكل يديكى من تحت حاجات تانيه

نور: هههههههههههههههههههههههههه

أحمد : لا دا عبعال فظيع تصورى عبعال فى مرة كنا بنتعشا فا أمى
كانت عاملالنا بيض ومش وكان فى المش دود وكان عبعال بجاله يومين
مكالش لحمه راح واكل الدود وساااب المش !!

نور: يوميين مكاالش لحمه !!!! ههههههههههههههههه

أحمد : لأ وايه وبعد ما أكل الدود والبيض دخل الحمام

فضلت يا نور البلد كلتها 7 أيام تعانى من سد فظييييع فى المجارى

نور: هههههههههههههههههههههههه يع يع

أحمد : مقولكيش بجا على صابحه

نور: لألأ كفااااااايه لحد كده

أحمد : لا كله إلا صابحه .. صابحه وهى صابحه.....

وفجأة واحمد بيتكلم مع نور راح طابب عليه واحد بلدياته من البلد واحمد بقى مرعوب ليشوفوا ويجى يسلم عليه ويفضحه قدام نور

وفعلا ده اللى حصل وبلدياته شافه وراح رايحله علطوووووووووووول

أحمد وشه جااااااب 100 لووووون وخااااااف ليتفضح قدام نور وتعرف ان ابوه ولا عمده ولا حاجه

ورااااااااح دااااخل بلديتناااااا على احمد ..........

الحلقة 13&14





ودخل بلديتنا على احمد

صميده : أحمد بلدياتى حبيبى ازيك يا صاحبى عامل ايه

أحمد : ازيك انت يا عواد

بينه وبين نفسه (( الله يخرب بيتك ايه اللى جابك دلوجتى يا صميده يا غلس )).!؟

صميده : ( عواد ) مين انت مش فاكرنى ولا ايه يا احمد

أحمد : لالا طبعا ازاى يا حمدان فاكرك وانا اقدر انساك

صميده : حمدان مين يا احمد انا صميده ابن عمك الحج شعبان بتاع البليله

أحمد : ااااااه يا جدع وانا اقدر انساك برده ايه اللى انت بتجوله ده وايه اللى جايبك هنا يا حمار قصدى يا صميده

بينه وبين نفسه (( تيجو من بلدكوا وتقرفونا هنا )).!؟

صميده : طب والله يا احمد انت كنت واحشنى جوى جوى
فاكر يا احمد ايام زمان اما كنا .......؟

وراح احمد قاطع كلامه

أحمد : اااه طبعا طبعا فاكر يا صميده وانا اقدر انسى

بينه وبين نفسه (( اه يا ابن الدزمه هتفضحنى جدام نور ))..؟

صميده : فاكر اما كنا بنروح نلعب مع البهايم فى زريبه العمده اللى كان شغال فيها ابوك الحج هريدى

أحمد : هههههههههههههههههه دا انت بجى دمك شربات وزى السكر يا صمصم

صميده : ولا فاكر اما كنا بنروح الترعه اللى كنا كل يوم نروح ناخوض بلنصات فيها

أحمد : هههههههههههههههه يخرب بيت شيطانك يا جدع

بينه وبين نفسه (( عليا الطلاج شويه وهولع فيك يا ابن الدزمه )) ..؟

صميده : ياااااااه كانت ايام

أحمد: ااااااااه (( الله لا يرجعها ))..؟

نور طبعا قاعده بتحاول تفهم اى حاجه بس مش قادرة واقعه من الضحك وفى نفس الوقت مستغربه

صميده : انما مجولتليش يا احمد انت هنا بتعمل ايه

أحمد : بشم هوااااا اصل الجو حر جوى جوى هناك فى مصر

صميده : طب ما انت فى مصر برده يا احمد ولا انت حد ضحك عليك وفهمك انك مسافر بلاد بره

أحمد : يااااااه عليك يا صميده مش بقولك دمك بجى زى السكر .. قصدى على القاهرة يا خاااااافيف

صميده : اييييييييه ده وبجيت قاعد فى القاهرة كمان ؟

أحمد : وفيها ايه يعنى ياخويا ولا هما كاتبين عليها ممنوع دخول الحيوانات

نور : ههههههههههههههههههههههههههههههه

صميده : لا لا يا ابن عمى مجصوتش طبعا

أحمد : لا يا سيدى ولا تجصد

بينه وبين نفسه (( ايوه كده ادب معاه خناجه علشان يغووور ابن الدزمه ده )).؟

صميده : انت زعلت ولا ايه

أحمد : لا يا سيدى وهزعلى من حمار زيك ليه قصدى وهزعل منك ليه

صميده : طب حجك عليا

أحمد : انما مجولتليش يا سى صميده انت هنا بتعمل ايه ؟

صميده : انا يا ابن عمى شغاااااااااال فى مطعم فى فندق اسمه تروبيكالا

نور : هههههههههههههههههههههههه اسمه تروبيكانا

أحمد : وكمان مش عارف اسم الفندق اللى انت شغال فيه جتك نيله عليك

صميده : ولا يهمك يا جمر . اللى انتى تجوليه هو الصح

وبعدين مش تعرفنا يا احمد على المزمازيل اللى معاك

أحمد: لا يا سيدى مش هعرفك وبعدين انت مالك

صميده: كده يا ابن عمى ماشى ولا يهمك عادى انما انت مجولتليش عبعال اخوك عامل ايه مع البلد وعمل ايه فى الازمه اللى كان بيسببها للبلد كلها كل ما يدخل الحمام اصل بجالى كتير منزلتش البلد

نور: هههههههههههههههههههههههههههههه

أحمد: يالهوووووووى على تجل دمك يا صميده

انت ياض جايب الغلاسه دى منين ؟

أحمد : اييووووه صميده اهو .. اللحج يا صميده اظاهر كده فى حد بينده عليك هناك وبيجول المدير عايزك

صميده: يالهووى المدير عايزنى يجى فى مصيبه حصلت

هجيلكوا تانى

نور : ههههههههههههههه مقولتليش مين ده يا احمد

أحمد : ده ؟ داااا صميده ابو الغلاسه والرخامه والرزاله كلهاااااااااا

نور: هههههههههههه لا ما هو باين عليه

وبعدين هو الكلام اللى بيقوله ده حقيقى

أحمد : يا سيتى متحوطيش فى بالك بجولك دا صميييييييده

أحمد : الله يخرب بيته مخلناش نعرف نتكلم مع بعض

نور: لا عادى يا احمد ولا يهمك بس انا زعلانه ان خلاص قربنا نرجع

أحمد : وانا كمان والله يا نور

نور: طب انت هتعمل ايه دلوقتى يا احمد ؟

أحمد : انا جعاااااااااان

نور: هههههههههههه انت على طول كده يا احمد اكل اكل على طول

أحمد : يا باااااى عليكى وعلى جرك هو مش انتى جولتى انهم عاملين الاكل ابون بوفيه

نور: ههههههههههههههههههههه ايه ( ابون ) ؟ هههههههههه اسمه اوبن بوفيه

أحمد : يااااااااااه على رزالتك انتى كمان هتعملى زى صميده ولا ايه

بتيجى انتى فى الحاجات التافهه وتتكلمى

نور : ههههههه خلاص معلش

أحمد: طب ايه تيجى تاكلى معايا

نور بكسوف راحه قايلاله اوكى

أحمد : وبتجولى مش جعانه يالهوى عليكى تلاجيجى هتروحى هتعتدى على البوفيه كلها

نور : دا انا برده اللى كل شويه بقول انا جعان انا جعاااااااان

وراحوا الاتنين للبوفيه ويا ريتهم ما راحو للبوفيه


وراح احمد ونور اللى الابون بوفيه علشان ياكلوا
:
:


المهم نكمل بقى...........

دلوقتى هما فى البوفيه

أحمد : عايزك يا بت يا نور تاكلى وتملى بطنك على الأخر جبل ما الوكل يخلص

نور : ههههههههههه يخلص ايه بس يا أحمد وبعدين البوفيه مفهوش حد كتير بياكل معانا

أجمد : برده يا نور انتى متضمنيش الاحتياط واجب بجولك ايه

ناولينى كده الفرخه اللى ناحيتك هناك دى وطبج المحشى اللى جنبيها بالمرة

نور : طيب بس انا اول مرة اشوفك جعان اوى كده

أحمد : لألأ اتعودى على كده خلاص دا احنا فاضل يوم ونرجع دا انا مش بعيد ابات فى الابون بوفيه بتاعكوا ده فلازم املا بطنى على الاخر

نور: ههههههههههههه طب ما انت اكيد هتجوع تانى يا ابنى اما ترجع

أحمد : ياباااااااااااااااى عليكى يا نور اسكتى بجى خلينى اعرف اتمزج بالفرخايه الجميله دى

دا انا اخر مرة كلت فيها فراخ اما كنت فى الشجه اللى انا جاعد فيها فى مصر وكانت كمان عملهالى الوليه المايصه جارتى بس كانت ماسخه زيها

نور : ماااشى اتفضل كل انا مش هضايقك تانى

وطبعا كده هما كانوا خدوا الاكل وقعدوا فى المطعم بتاع البوفيه على التربيزة يعنى

أحمد : متزعليييش... بس انا جعان وهنكمل كلامنا بعد ما اخلص يا جمر

نور: طب كل برااحه محدش بيجررررررى وراااك

أحمد : حااااضر ... كده كويس ؟ طب خدى ورك الفرخه دى منى ليكى

نور : لالالا شكرا مش ينفع خالص فراخ مع سمك فليه

أحمد : مع اييييييييييه ؟ سمك فاااااليه ؟

نور: ايه يا احمد متعرفش السمك الفليه مش الفاليه

اللى هو بيكون من غير شوك

أحمد : إيوه إيوه عرفته خلاص اللى بيعوم فى الإحواض بتاعت السمك ده

نور: ههههههههه يااربى ... ايوه هو يا احمد كل بقى

أحمد : طب خدى اى حاجه منى اجبرى بخاطرى يا نور طب اجولك خدى يا سيتى

الطبج بتاع السلطه ده وجومى امليه سلطه وتعالى

نور: نعم نعم نعم ؟؟؟؟ من عينى يا أحمد

أحمد : تسلم عيونك يا جمر انت

وبعد ما راحت تجيبله السلطه بيكلم نفسه (( اومال ايه نعم نعم نعم دى اللى قالتها دى زى حاضر مثلا عندها ولا ايه ))

المهم وهما قاعدين كان بياكل على الطربيزة اللى جنبيهم واحد من الجامعه برده معاهم واسمه ميدو ..... بس اييه قاعد معاه اربع بنات وشغالين بقى ايه ضحك ومقضيناها خاااالص ( عقبالى يارب )

والواد ايه من الشباب الجامد جدا جدا واللى بيجيبوا من الاخر

نور: ايه ده يا احمد ده ميدو اهو

أحمد : يكونشى عادل امام يعنى ؟ ميشو مين ؟

نور : ميدو يا احمد بقولك ميدو الولد اللى معانا فى الجامعه

احمد : طب اهلا وسهلا اجوم ابوسهولك يعنى ولا اعمل ايه ؟

نور: طب انا هقوم اسلم عليه واقوله على حاجه كنت عايزاها منه

أحمد : نعم يا ست الجمورة تجومى تسلمى علييييه لييييييييييه ؟ يكونش حد جالك انك قاعده مع سوسن ؟

نور : ههههههههه لأ والله مش قصدى بس اصلا كنت عايزة منه رقم الموبيل بتاع اخته علشان كنت عايزاها فى حاجه

أحمد : ااااااااااه وبعدين ايه اللى عامله فى شعره ده وايه النضارة اللى قد ودان الفيل اللى لابسها على عينه دى ودى يا ترى حفظ نظر ولا لابسها كده يتمرجع بيها جدام البنات

نور : دا استيل مووووت يا احمد وعسوووول اوى اوى

أحمد : طب ما تجومى تاخديلك كده بوستين على الماشى منه

نور: لأ انا بقولك يعنى انه استيل مش اكتر وبجد انا دلوقتى عايزة رقم اخته اعمل ايه وكل ما اشوفه انسى اخده فا دلوقتى فرصه وانا فاكره

أحمد : طب من الاحسن انك تندهيلوا وهو يجى احسن

نور: طيب اوك فكره برده

نور: ميدووو ميدووووو

ميدو : ايه ده نور ازييييك يا بنتى

وراح قايم من على الطربيزة وراح رايح عند طرابيزتهم

ميدو : ايه يا بنتى محدش بيشوفك ليه مختفيه يعنى

نور : معلش بقى يا ميدو انت عارف الشهرة والاضواء فا لازم ههههههههه اعرفك احمد يا ميدو وده ميدو يا احمد

ميدو : ازيك يا ابو حميد وايه يا عم المطعم اللى انت فاتحه قدامك ده

نور : ههههههههههههههههههههههه

أحمد : هههههه مش كنتى تجوليلى يا نور ان ميشو صاحبك دمه خفيف كده

ميدو : وانت معانا بقى يا مان فى الجامعه

أحمد : مان ؟؟؟؟؟؟ بتجولك احمد وبعدين مان دى شتيمه ؟؟؟؟

ميدو : لأ يا صاحبى عيب عليك دى معناها راجل بس بالانجلش

أحمد : ربنا يخليك يا ميشو قصدى يا ميدو انت اللى شكلك راجل

ميدو : ربنا يخليك

أحمد : ويا ترى النضارة دى نظر ولا ايه ؟

ميدو : هههههههههههههه نظر مين يا عم الحج انت ايه مش شايف السواد اللى فيها ولا ايه

دى نضارة شمس يا صاحبى

أحمد : اااااااه اللى هى ضد الشمس وكده

زى قبنورى ضد الحرق وضد الكسر هههههههههههههههه

نور : احمد يا ميدو من الناس القريبين اوى منى فى الجامعه

ميدو : اهلا وسهلا يا مان بلاش مان دى اهلا يا صاحبى وفرصه سعيدة

نور: كنت بقولك ايه يا ميدو كنت عايزة رقم سارة اختك علشان كنت عايزاها فى حاجه

ميدو : بس كده يا جميل هاتى موبيلك وانا اكتبهولك

نور : اتفضل

ميدو : مش عايزين منى حاجه بقى يا جماعه انا جمبيكوا على الطرابيزة لو عوزتوا اى حاجه منى

ماشى يا ابو حمييييييد

أحمد : ماشى يا صاحبى ربنا يخليك

نور : شوفت بقى انه طيب وعسل وجدع كمان

أحمد : ما خلااااص يا جمورة ايييييه ده كله كفاايه حاجه واحده

نور: ايه رايك يا احمد تعمل نيولوك فى شعرك ولبسك وطريقه كلامك وكده زى ميدو

أحمد : بجولك ايييه وماله شعرى ولبسى وطريقه كلامى يا ست هاااااانم

ايه شايفانى اراجوووووز ؟؟

نور: لأ يا احمد والله مش قصدى بس انا قصدى ان الناس كلها بتعمل تجديد فى شكلها وكده وهيبقى للأحسن طبعا فاكر اخر مرة عملت فيها كان جميل ازاى

أحمد: اه طبعا وانا اقدر انسى بأمارة اما الحلاق اللى حلقلى تانى يوم مات

نور : ههههههههههههههه

أحمد : اه والله انتى فاكرانى بهزر فا مش ناقصين حد يموت تانى كفايه المرة اللى فاتت

ومن ساعتها وانا متعقد من البلوتوك

نور : ال ايييييييييييييه ؟ يا اربى اسمه نيو لوك

احمد : مش موضوعنا دلوجتى يا رخمه ... طب انا موافج بس عايز حلاج يكون كويس بقى ومش من اللى بيموتوا

نور: ولا يهمك يا سيدى كده كده احنا خلاص راجعين بكره اما نرجع اخلى ميدو يوديك للحلاق اللى بيروحلوا وبعديها ننزل نجيب اللبس كمااان ايه رايك ؟

أحمد : ماااشى يا جمر . بجد يا نور مش عارف اجولك ايييييه يا نور انتى طيبه جوى جوى

نور : لأ يا احمد متقولش كده انت متعرفش انت ايه بالنسبالى

أحمد : طب انا هجوم اغسل ايدى

طبعا نور اضايقت علشان احمد قطع الحوار الرومانسى اللى كان ابتدى بينهم

نور : طيب اوكى اتفضل يا بيه ..... وانا هاطلع أغير هدومى

احمد استنهز فرصه ان نور طلعت تغير هدومها وراح اعد جنب الوليه

الوليه مش معبراه خالص

احمد : يالهوي علي الغزال اللي بيلعب في الرمل

الوليه : ......................... ؟

احمد : يالعوي علي الحصان اللي اعد علي شط

الوليه : .........................؟

احمد : يالهوي عالجمر اللي الميه بلته

الوليه : .........................؟

احمد اتخنق وزهق كل الكلام ده والوليه مش راديه تعبره

احمد عجبه تقل الوليه وحنا عارفينه صعيده ومخه تخين لازم يكلمها

احمد : ايه يا عم التقل دا عبرنا ولو بنظره

الوليه خدت بالها ان في صوت بيتكلم بصتله

احمد : يا دين النبي ايه العنين الدامده دي

احمد : بس بس بس بس بس بس انت يا جمر

الوليه : ......................... ؟

احمد سرحان في عيون الوليه ومش عارف يقول ايه اتبلم

يالهوي دا نور جايه في الطريق واحمد لسه مبلم في عيون الوليه

نور : احمد " احمد مش هنا خالص راح في دنيا تانيه " مش معانا

نور : احمد احمد احمد

احمد : ايه مين

نور : ايه يا بني انت سرحان في ايه كده

احمد : لا مافيش

نور : طيب انتا جاي معانا ولا اعد

احمد : نروح فين

نور : هنروح نفطر ونطلع علي البلاج

احمد : طيب روحه انتوا انا اعد هنا شويه

نور : لا يا احمد تعالي معانا

احمد : لا انا عايز اعد هنا شويه

نور : كده يا احمد مش عايز تروح معايا

احمد : خلاص خلاص انا هاجي معاكي جومي كتج الجرف

نور : بتقول حاجه يا احمد

احمد وهو ماشي في سره با بنت الدزمه لازم تيجي دلوقتي انا كنت خلاص هكلم الوليه

نور : احمد انت بتقول حاجه

احمد : لا

نور : طيب انت مش هتطلع تغير هدومك وتلبس الترنج اللي من السعوديه الجامد جدا ده

احمد : اه والله فكرتينني بصي انا هطلع اغير وابقي اجيلك روحي انتي


احمد وزع نور وطلع غير هدومه وما راحلهاش راح فين


هنعرف الحلقه الجايه

اوعى تنسوا الردود

ههههههههههههه
اسال انا
والله حلقات جميله جداااااااااااا
ومن احسن المواضيع فى المنتدى والله
اما نشوف ايه قصه الوليه دى
متتاخريش بقى

ده هيبقى شكله استاااااااااااااااااااايل
هههههههههههههههههههههههه

لاء مش بعدين انتى فيننك من زمان اصلا
يلا بقى خلصيها

يلا يا لوفلى كملى يعنى انتى شغالة مواضيع
وجاية تعلقينا ع الحلقة الاخيرة
كملى بسرررررررررعة

ههههههههههههههههههههههههههههه
هههههههههههههههههههههه
انا ازاي مش تبعت القصه دي
بس ولا يهمك يا لافلي
انا قريتها كلها امبارح والنهارده
وفين الحلقه الاخيره بقي يلا
بس بجد جمييييييييييييييله جدا
ومسليه ومضحكه القصه دي

جميله جدا يا لوفلي انا بقي قرأتها كلها النهارده
الحلقه الاخيره بسرعه بقي

اتصرفى مع اختك يا بيوتى
هههههههه

يلا يا لافلي انا مستنيه الحلقه الاخيره بفارغ الصبر

لوفلى عندها امتحان النهاردة وهى وبوسي بيذاكروا
اصل انا الفاشلة الوحيدة اللى فى البيت
ههههههه

واحتكرتى انتى بقى الجهاز
ااااااااااااه
بردو منورانا مقدرش اغلط انا بقى
ههههههههههههههههه

هههههههههههههه
طبعا ما تقدرش
بس انا لسه قعدة من ساعة

ههههههههههههههههه
الحمد لله ابو الهول نطق

بس هي خلصت كده
وبعدين ده حب مبني علي كدب اساسا
مهي نور لسه متعرفش انه كداب
ومش ابن عمده ولا حاجه
واللي بيتبني علي كدب وخداع
عمره ما بيستمر

ميرسي يا لالفي القصه الجمييييييييله دي

هههههههههههههههههههههههههه
وقد ازدل الستار على احمد ونور
ومجدش يقولى ازدل غلط هههههههههههه
بس والله قصه جميله اوى
ويارب يجيبوا عيال جمامير
حلوة جمامير دى هههههههههههه مهو من قرايتى للقصه
تسلمى با لافلى

هههههههههههه
جميله جدا يا لوفلي بس فعلا نهايتها مش مظبطه

ههههههههههههه ماعلش بقي يا جماعة بس أنا نقلاها كده
ميرسي علي المرور

على فكرة ازدل دى المفروض تبقى اسدل يا سيكو
ههههههههههههههههه
ده انا هاكل ضرب
قصة جميلة جدا يا لوفلى بس زى ما قالوا النهاية مش متظبطة

ومجدش يقولى ازدل غلط هههههههههههه

شايفه انا كنت كاتب ايه؟
ههههههههههه
بس عموما ماشى يا بيوتى
هو اكمن الاجازة كانت صغيرة بس ومش لحقت اخدت كورس عند كيتى
بس صبرك عليا يا بيوتى
ههههههههه

هههههههههههههههههههه

هههههههههههههههههههههههههههههههههههههههههههههه
طب انا بقول ايه كملوا انتم نهايه للقصه دي
اهو ممكن يكون في نهايه واقعيه
او كوميديه
ههههههههههههههههههههه
اهو يبقي منتديات سيمو موبايل منفرده بتغير القصص
والمؤلفات الادبيه هههههههههههههه

وبعد ما اتجوزوا
نور : احمد انا عاوزة اروح اقعد معاكو فى البلد
احمد: انتى اتجننتى يا بت ولا ايه؟
نور: اتجننيت ليه يا احمد انا عاوزة اعرف اهلك واقعد معاهم واقضى يومين
احمد: بلد ايه ووجه دماغ ايه دلوقت هنا احسن يا نووور
نور: هو انا كل لما اقول حاجه تقولى انتا لاء لاء انا بقى عاوزة اقعد فى البلد يومين
احمد : لا اله الا الله اقصرى الشيطان يا بت
نور: يعنى فيها ايه يعنى يا احمد منتا باباك عمده وهيفسحنى فى البلد
احمد: الله يخربيتك يا حد
انتى عاوزة ايه من الحد دلوقت
نور: فى ايه يا احمد منا هقعد يومين نغير جو منتا عارف الجو هنا خنقه اوى
وكمان انا نفسى اتفسح فى البلد شويه واركب حمار كده والفها
واذا كنت قلقان عليا يا سيدى ابقى خلى والدك يمشى معايا غفيرين
احمد: ههههههههه غفيرين ايه بس دلوقت يا نور
طب بقولك اتخمدى انتى دلوقتى ونتكلم الصباح
الصباح رباح يا بنت الناس
نور: اتخمدى؟ بقى كده يا احمد
احمد : يا بت بهزر معاكى ده انتى جمرتى
ادخلى نامى بس يا جمر ونتكلم الصبح
نور: خلاص تصبح على خير
احمد : وانتى من اهله يا جمييييييل

ههههههههههههههههههههههههههه
جميله يا سيكو والله
كمل يلا
شكلها هتبقي جميله القصه دي

اوك
جميلة جدا الفكرة
بس ياريت ياسيكو يكون اسلوب الحوار الصعيدى بكلمات
جميلة من الواقع الصعيدى الطيب
ومايكونش فيه كلمات مش لطيفة ويكون السرد فى اسلورب راقى طبعا

بس فكرة جميلة جدا ياكيتى
وكمل ياسيكو واحنا معاك

اعتزر طبعا عن الاسلوب اللى حصل
بس والله ده كان ارتجاليا من غير لا تحضير ولا حاجه
انا لاقيت كيتى بتقول كده
ولاقيت صوابعى مبتقفش وكتبت كده ههههه
يعنى من غير مونتاج ولا من غير اى حاجه
لكن لو الفكرة عجبتكوا ان شاء الله هحاول اكمل
مع مزيد من الرقى بالاسلوب
شكرا لارائكم وفى انتظار باقى الاعضاء
وخصوصا لافلى لانها صاحبه الموضوع

جميل جدا يا سيكو
و القصه هتبقي احلي كتير
بس يا ريت فعلا تبقي باللغه الصعيديه
زي ما كانت طول الموضوع
و في انتظار حلقات جديده

حاضر من عنيا والله
انا عارف انى دبست نفسى ههههههههه
بس عموما ميرسى اوى لردك الجميل ده يا بوسى
وبليز استأذنيلى من لافلى

خد راحتك يا سيكو هههههههه
استأذنتهاك خلاص

وبقى عندنا فى المنتدى مؤلفين كمان والله كويس جدا
كمل يا سيكو القصة شكلها هتحلو
وماتنسيش بقى يا كيتى الكورس فى الاجازة
هههههههههههههه