غبار لا تراه العين

تحت اطار هذا العنوان
وهذه الصورة

ضع تعلقيك على فهمك للعنوان
وما استنتجته واستوحيته منه

وعلى اساس ردودكم
سوف اضع فصول المسرحية بين ايديكم
اتمنى ان تنال اعجابكم
ولكن اود ان اعرف مدى فهمكم لعنوانها

اممممممممممممم
مش عارفه بس ينفع لمعاني كتير يا سيمو
ممكن نقول
الحب
او الثقه في الاخرين

ميرسى كتييييييير لمرورك ياكيتى
بس للأسف تعليقك جه بعيد خالص عن مضمون المسرحية

انا مستنى بقيت الناس ولا ما انزلهاش

منا مش فاهم
استنى لحد ما احااول افهم
ههههههههههههه

امممممممممممممم
فكرت كتير عشان احاول افهم العنوان ده
بس يمكن بيتكلم علي انك تتخدع في حد يعني يبان من بره انه حد كويس و لما تعرفه كويس
تحس انك مخدوع فيه

للدرجادى العنوان صعب
وما اتفهمش من الصورة اللى دوخت علشان اجيبها
لسه محدش وصل للفكرة المطلوبة

امرى لله هنزل الفصل الاول من المسرحية


الفصل الأول	المشهد الأول
المنظر	داخل الفصل الدراسى يجلس أ/شوقى مدرس الحاسب الآلى على كرسيه منهمكاً فى عمله بينما يقوم الطلبة بعمل ضجة عالية
أ/شوقى	بس ياله انت وهيا مش عاوز نفس فى الفصل
الطلاب	يلتزم الجميع الصمت ويعم الهدوء
	يضرب جرس انتهاء اليوم الدراسى ويقوم الطلاب بضجة ثانية استعدادا للخروج
أ/شوقى	استنى ياض منك ليها مكانكم هوا انا لسه خرجت من الفصل آه ياشوية حوش ؛ طب اللى هيجى مش عامل الواجب بكرة هيتضرب خمس عصيان وربع وم الحق استاذ عامر بيقولكوا كل واحد يجيب علبة ألوان فلوماستر جديدة علشان هتبدأو الشغل بيها م الحصة الجاية ؛ واللى هيغيب ، او يعمل نفسه نسى انتوا عارفين الاستاذ عامر بيعمل ايه وعلى فكرة هوا قالى العلبة دى ب6 جنيه علشان محدش يستعبط على اهله ويضرب الباقى فى جيبه ( يذهب المدرس الى باب الفصل ثم يعود ثانية ) لم يا أحمد جنيه من كل واحد علشان امتحانات الشهر الأسبوع الجاى
أحمد	ألم الفلوس دلوقتى يا أستاذ ولا بكرة
أ/شوقى	لأ دلوقتى يا لمض وبسرعة علشان ماتعطلش اصحابك
أحمد	حاضر يا أستاذ ( يذهب الى هشام ) هات ياهشام الفلوس
هشام	خد ياله بس هات الباقى ( بإسلوب متشرد )
أحمد	مالك منفوخ علينا كده ليه ياعم
هشام	اعد ساكت ياض لاديك فى وشك
أحمد	طب ياعم ماتزقش ، هات يلا يامراد
مراد	معكيش جنيه ياهدى
هدى	مانت عارف معيش الا تلات جنيه جنيه هدفعه ليا والباقى عشان نروح بيه
مراد	آه نسيت معاكش جنيه ياهشام وابقى اجيبهولك بكرة
هشام	آه معايا بس الجنيه ده يرجعلى جنيه ونص
مراد	طب هات ياسيدى وخلاص ( يمد يده بحسره )
هدى	لأ خلاص خد يا أحمد اتنين جنيه اهو انا ومراد
	وبعد لم الفلوس يخرج الجميع الى الشارع
الفصل الأول	المشهد الثانى
المنظر	فى الشارع فى طريق العودة الى المنزل
هدى	بقولك ايه يامراد ؛ اللى انت كنت هتعمله مع هشام ده حرام
مراد	حرام !!! حرام فى ايه بقى ان شاء الله ؟ ( بسخرية واستغراب )
هدى	حرام فى ايه ؟!!! يعنى انت مش عارف ان اللى كنتوا هتعملوه ده ربا
مراد	ربا ؟ ههههههه ؛ يعنى فى نص جنيه تبقى ربا ، ياشيخة روحى
هدى	ماتستهترش كده ، ده حتى لو فى قرش واحد زيادة تبقى ربا وحرام انت مش عارف ان آكل الربا وكل من اعان عليه ملعونين يعنى مطرودين من رحمة ربنا
مراد	ازاى يعنى ؟
هدى	انت ماسمعتش حديث رسول الله صلى الله عليه وسلم
مراد	عليه الصلاة والسلام
هدى	الحديث بيقول ( آكل الربا ، وموكله ، وكاتبه ، وشاهداه اذا لمسوا ذلك ، والواشمة ، والموشومة للحسن ، ولاوى الصدقة ، والمرتد اعرابيا بعد الهجرة ملعونون على لسان محمد يوم القيامة
مراد	آه صدقت يارسول الله ؛ انا متشكر ياهدى على نصايحك
هدى	الشكر لله ، بس على الله يتمر فيك ياخويا يامغلبنا
	يمشى بائع الأيس كريم مناديا بصوت مرتفع
بائع الأيس كريم	ايوه الأيس كريييييييييم ، ايوه الدولسيكااااااااا
مراد	ياعم حسين ، ياعم حسين . معاك كونو ؟
بائع الأيس كريم	آه من اللى ب3جنيه دى
مراد	طب هات اتنين ياعمو وخد 6جنيه اهم
بائع الأيس كريم	اتفضل ياحبيبى مع السلامة ( ثم يكمل سيره مناديا ومبتعدا لخارج المسرح )
مراد	خدى ياهدى امسكى
هدى	هات ، بس انت جبت الفلوس دى منين دلوقتى ؟ مش انت مكانش معاك !
مراد	افتكرت انهم كانوا فى الجيب الورانى ، كلى يلا بسرعة علشان قبل ماتسيح
الفصل الأول	المشهد الثالث
المنظر	يقف مراد واخته على الباب وتفتح لهم والدتهم ويدخلان الى الشقة
مراد	سلامو عليكوا ، ازيك ياماما ؟
هدى	سلامو عليكوا
امانى	وعليكم السلام ورحمة الله وبركاته ، اتأخرتوا ليه ياولاد ؟
هدى	لا اصل احنا كنا جايين مشى
امانى	مشى ! مشى ليه ؟
هدى	اصل مراد كان ناسى انه حاطط الفلوس فى الجيب اللى ورا
مراد	ماما احنا هندخل نذاكر بقى
امانى	يلا بالتوفيق ياحبايبى
	وبعد دقائق يرن الهاتف
علاء	قوم رد يامراد واى حد انا مش موجود
مراد	حاضر يابابا ( يرد على الهاتف ) سلامو عليكوا
المتصل	وعليكم السلام ، د/علاء موجود لو سمحت ؟
مراد	لا مش موجود ، لما يجى اقوله مين ؟
المتصل	قولوا عمو طاهر جاركم ، سلامو عليكوا
مراد	وعليكم السلام ، ده عمو طاهر اللى كان بيتصل يابابا
علاء	آه انا مش بطيقه الراجل ده ، يلا خش انت كمل مذاكرتك
	وبعد فترة يدخل الاب غرفة الاولاد للإطمئنان
علاء	ها ياولاد عاملين ايه فى المذاكرة ؟
مراد وهدى	الحمد لله يابابا
علاء	امممم طب الحمد لله ، جيبت ياعلاء علبة الألوان زى اختك ولا لسه ؟
مراد	( بإرتباك ) ايه ، آه ، لأ ، اصل الفلوس ضاعت منى يابابا
علاء	ضاعت ازاى يعنى ؟
مراد	ازاى ؟ آه ؛ انت ماهوا انت ماتعرفش اللى حصل مش واجنا جايين انا وهدى كان فى كلب جرى ورانا وانا كنت لسه بطلع الفلوس قدام المكتبة ، ووقعت منى بقى وانا بجرى ؛ مش كده ياهدى ولا ايه؟
	يظهر على وجه هدى الاستغراب
علاء	( يرفع صوته ) صحيح الكلام ده ياهدى ؟
هدى	لأ مفيش اى كلاب جريت ورانا يابابا ، ولا حتى شوفنا اى مكتبات واحنا مروحين
علاء	طب وتكدب عليا ليه يامراد ؟
مراد	خوفت يابابا لحسن تضربنى ، وكمان ماهو حضرتك لسه من شوية قايلى لو حد اتصل بيا انا مش موجود ؛ مش ده كدب برضه ؟
علاء	( بإرتباك ) ايه ؟ لا لا ده انا مكنتش عاوزه الراجل ده
مراد	خلاص يابابا لو مش عاوزه تبقى تشوف الرقم ومتردش عليه وعلشان كده انا عملت زيك يابابا وكدبت
علاء	( بغضب ) خلاص خلاص فضنا من دى سيرة ويلا قوموا علشان تتغدوا

انا مكنش ظاهر عندي صور في الاول علي فكره

جااااااااااااااااااااامد جااااااااااااااااامد
يا جماعه انتو مش مقدرين ان ازاى واحد يقعد يفكر فى فكرة ويعملها
ويقسمه فصول ومشاهد
ويعملها فى جدول وكل ده من مجهوده ومن غير كوبى باسط
بجد بجد ربنا يكرمك يا سيمو
انتا فعلا تستحق تكون ادمنا

اه بجد عندك حق يا سيكو في كل كلمه
و بجد جميله جدا يا سيمو

ربنا يخليكوا ياجماعة
بجد ردودكم الجميلة دى
هتخلينى انزل بقيت الشغل بتاعى

بس برضه فى حد وصل لفكرة المسرحية ولا لسه
ده انا معملتهاش الا علشان العنوان ده

ومع ذلك هنزل بالفصل التانى


الفصل الثانى	المشهد الأول
المنظر	تقف هدى مع مراد فى ممر الفصول ويقف هشام مع زملائه ويجلس الفراش امام حلوته وباب غرفة الحاسب الآلى مغلق بعيدا عن هدى ومراد
هدى	تيجى نروح اوضة الكمبيوتر يامراد
مراد	آه فكرتينى علشان نعرف الدروس اللى فاتتنا لما كنا فى الرحلة
هدى	طب يلا بينا ( يذهبان الى الغرفة ويجدا الباب مغلقا )
مراد	اوبس ده الاوضة مقفولة
هدى	طب وهنعمل ايه دلوقتى
مراد	استنى جايلك اهوة ( يذهب الى الفراش ) عم متولى هوا الاستاذ شوقى موجود النهاردة ؟ ولا لسه مجاش ؟
الفراش	لا لسه ، فى حاجة ولا ايه ؟
مراد	اه اصلنا كنا عاوزين مفتاح اوضة الكمبيوتر
الفراش	هوا المفتاح معايا بس هوا قالى ما اديهوش لحد ( ويحرك ما فى جيبه من نقود معدنية )
هشام	واد يامراد تعالى عاوزك فى كلمة ، انت بتفهم ياض ولا لأ ؟
مراد	آه الحمد لله بفهم
هشام	طب مادمت بتفهم ياعم الامور ، مش الراجل شخللك جيبه ؟
مراد	آه بس يعنى ايه شخللك جيبه دى ( بإستهزاء )
هشام	يعنى بالعربى كده بيقولك هات كوينز ولا حاجة وهيديلك المفتاح
مراد	آآآآآآآآآآآآآآه لأ ناصح ياله ( يذهب مراد الى هدى ) هدى هاتى ربع جنيه كدا
هدى	ليه ؟
مراد	يعنى عم متولى عاوزه علشان يدينى المفتاح
هدى	آآآه رشوة يعنى
مراد	هههه رشوة ايه يابت ماتحبيكهاش ، هاتى ربع جنيه خليكى جدعة
هدى	لاااااا انسى ياعمرو ، انا لايمكن اعمل حاجة زى دى ابدا
مراد	انسى ياعمرو ! انا ما اسميش عمرو وعموما انا مش عاوز منك حاجة واد يا اتش
هشام	عايز ايه ؟
مراد	هات ربع جنيه سلف
هشام	بس انت عارف ، هيرجعلى نص جنيه ؛ امسك ياعمونا
مراد	هات ياعم ، عاملالى فيها شيخة الهانم
هشام	مين دى ؟
مراد	ملاكش دعوة ( يذهب الى الفراش وبصوف منخفض ) امسك ربع جنيه اهو هات بقى المفتاح
الفراش	( ينظر متولى حوله فى قلق ) خد المفتاح اهوة وخلص بسرعة وهاته
	يأتى أ/شوقى بعد لحظات
أ/شوقى	سلامو عليكوا ، ازيك ياعم متولى ؟
الفراش	( يرتبك ) إيه ، ازيك يا استاذنا ؟ حمد الله عالسلامة
أ/شوقى	( يندهش ) ايه ده ؟ مين اللى فتح اوضة الكمبيوتر وانا مش موجود ؟ وايه ده كمان انت بعمل عندك ايه هنا يامراد ؟
مراد	( بخوف ) بشتغل عالكمبيوتر يا استاذ
أ/شوقى	ودخلت الاوضة ازاى
مراد	ايه ؟
أ/شوقى	( يرفع صوته ) ايه يابابا اتطرشت ؟ فتحت الاوضة ازاى ياض مانتطق
مراد	اديت ربع جنيه لعم متولى وادانى المفتاح
أ/شوقى	آه طب اركنلى انت بقى على جمب ، تانى ياعم متولى ؛ طب المرة اللى فاتت عديناهالك ، لكن المرادى لأ هخلى حضرة الناظر يحولك للتحقيق
أ/ماهر	فى ايه يا استاذ شوقى ايه الدوشة اللى عندك دى
أ/شوقى	الحمد لله اهو حضرة الناظر جالك بنفسه
أ/ماهر	خير ايه اللى حصل ؟
أ/شوقى	حضرتك انا كنت سايب مفتاح اوضة الكمبيوتر للفراش علشان ينضفها وقولتله مايديهوش لحد ، لقيته مديه لطالب مقابل فلوس
أ/ماهر	بقى كده ؟ انت دلوقتى محول للتحقيق يامتولى
الفراش	( بتوسل ) يابيه اناااا
أ/ماهر	بس خلاص مش عاوز كلام ، وانت يامراد هاتلى ورقة وقلم بسرعة
مراد	حاضر اتفضل
أ/ماهر	( بعد ان كتب فى الورقة ) خد يامراد الورقة دى اديها لوالدك وماتجيش المدرسة الا اما يكون معاك
مراد	( يقرأ مافى الورقة ثم يقول ) ايه ده ، ده انذار ياحضرة الناظر بس انا كان فى دروس فايتانى وكنت عاوز انقلها
أ/ماهر	طيب ما انتظرتش المدرس بتاعك لحد اما يجليلك ليه ؟ هه يلا كل واحد على شغلة ، وانت على فصلك ياقليل الادب
الفصل الثانى	المشهد الثانى
المنظر	فى البيت
	يدق جرس الباب ويفتح الأب
علاء	ازيكوا ياولاد ؟ حمد الله على سلامتكوا ، ايه مالكوا زعلانين ليه ؟
هدى	بابا . مراد اخد انذار من الناظر
علاء	ليه ؟ عملت ايه ؟
مراد	بابا انا هقولك على كل حاجة ، بس ياريت ماتزعلش منى وتعرفنى الصح
علاء	طب قول متخافش بس لو هتقول الحقيقة
مراد	انا كان فى دروس فايتانى فى الكمبيوتر انا وهدى لما كنا فى الرحلة فقلت اروح اوضة الكمبيوتر علشان انقلها لقيتها مقفولة والمفتاح كان مع عم متولى الفراش والاستاذ شوقى مكانش موجود قام هشام قايلى ادى لعم متولى فلوس علشان يدينى المفتاح قولت لهدى تديلى فلوس مارضيتش قمت واخد ربع جنيه من هشام وقالى اجيبهوله نص جنيه علشان انا كنت مضطر ودخلت انقل دروسى علشان ما اتأخرش فى المنهج وجه الاستاذ وانا جوا وحصل اللى حصل
علاء	طب انا هسامحك علشان حاجة واحدة بس انك كنت صريح معايا ودى اول حاجة تعلمك غلطك علشان ماتكرروش وهروح معاك المدرسة بكرة ونحل المشكلة
مراد	صحيح يابابا ؟
علاء	ايوه ياحبيبى
	يجرى الولد على ابيه فرحا ويعانقه
مراد	شكرا يا أجمل اب فى الدنيا
علاء	طب ادخلو اتغدوا وبعد العصر تبقى تنزل مع اختك للشيخ جلال على الله ربنا يهديك زيها
مراد	حاضر يابابا يلا ياماما الاكل بسرعة جععععااااااااااااااان
الفصل الثانى	المشهد الثالث
المنظر	فى المسجد يجلس مراد وهدى مع الشيخ بعد انتهاء الدرس
مراد وهدى	السلام عليكم
الشيخ	وعليكم السلام ورحمة الله وبركاته
هدى	ازيك ياشيخ جلال
الشيخ	نحمد الله يابنتى ، ده بقى اخوكى الفرقع لوز سى مراد اللى كل يوم يعمل مشكلة
هدى	والحمد لله ياشيخنا ربنا هداه وجه حضر الدرس معايا النهاردة كمان
الشيخ	الحمد لله والشكر لله خير ياولاد عاوزينى فى حاجة ؟
مراد	الحقيقة ياشيخ جلال انا بعد اما عقلت وندمت على غلطاتى وعرفت حاجات كتير فى درس النهاردة عاوز انصج زمايلى اللى بيغلطوا زيى كده علشان ربنا يهديهم هما كمان
الشيخ	جميل جدا يابنى والدال عالخير كفاعله
مراد	طب احنا عاوزينك تنصحنا بحاجة نعملها علشان ندل عالخير ده
الشيخ	آه . طب انا كنت عرفت من هدى انك عندك هواية الكتابة ومثقف إيه رأيك تستغل الثقافة والموهبة دى فى كتابة مجلات حائط دينية وتعلقها فى المدرسة
مراد	فكرة جميلة جدا ياشيخنا بس انا مبعرفش ارسم وكمان خطى وحش اوى ماهما دايما العلماء كده ههههه
الشيخ	هههههههههههه ربنا يكرمك يابنى طب بقولك . ايه رأيك تشوف اى حد من زمايلك بيعرف يرسم وخطه حلو وتشاركوا كلكوا فى الفكرة دى وتبقوا مجموعة مع بعض وانا عارفك ياهدى بتحبى الكمبيوتر ، ايه رأيك تاخدى المواضيع اللى مراد كتبها وتنزليها عالنت
هدى	الله . ده احنا هنبقى فريق جميل جدا وهيبقى ثوابنا كبير اوى
مراد	طب بعد اذنك ياشيخ جلال هنمشى علشان نبدأ فى الفكرة من دلوقتى سلامو عليكوا
هدى	سلامو عليكوا
الشيخ	وعليكم السلام فى حفظ الله يا اولادى

جميييييييييله جمييييييييييله جميله
بجد الله عليك يا سيمو
فصل حلو اوووووووووووى

الله الله الله
قصة حلوة جدا يا سيمو
مش راضي بقى تقول العنوان ده وراه ايه؟
خلاص غلب حمارنا
ههههههه

هههههه
لسه المناقشة مش دلوقتى
بس هانت خلاص

وفى اليوم اللى خلصت فيه يوميات اتنين مخطوبين
تنسدل ستائر مسرحية غبار لاتراه العين مع افصل الثالث والاخير


الفصل الأول	المشهد الأول
المنظر	يجلس مراد وهدى فى غرفتهم ممسكا مراد بالهاتف فى يده
مراد	سلامو عليكوا ، محمد موجود ؟ طب ممكن اكلمه ؟ مراد صاحبه حضرتك ايوه ياواد بقولك ، اشترى كام فرخ كده من بتوع اللوح وهات اقلام الخط بتاعتك ، عنك فرخين ، طب خلاص هاتم وهات العدة وتعالالى بسرعة ياعم انجز بقى ماتبقاش رغاى ، غور يلا ، ههههههه سلام ياحوبى
هدى	هات يامراد اما اكلم ريم دى رسامة درجة اولى واحنا ناسينها خالص
مراد	ماشى الموبايل اهوة بس اعملى حسابك الدقيقة بتحويل جنيه رصيد لما تشحنى
هدى	ها هنرجع تانى ولا ايه ؟
مراد	لا خلاص خلاص ، هوا الواحد مايعرفش يهزر فى البيت ده ابدا
هدى	آه بحسب ( وتبدأ فى المكالمة ) سلامو عليكوا ، ازيك ياريم ؟ وحشانى والله ياوحشة ؟ اخبارك كده وعاملة ايه ؟ والبيت عندك والناس والدنيا ؟
مراد	ايييييييييييييييه الرصيد ياما ، خفى ياماما خفى
هدى	خلاص ياعم ، بقولك ياريم . هاتى حاجة الرسم بتاعتك والواناتك معاكى وعاوزاكى حالا عندى ، يلا ماتضيعيش وقت لما تيجى هعرفك
	وبعد دقائق من الانتظار يأتى محمد وريم ويبدأ الحوار مع الجميع
مراد	برص ياباشمعلم منك ليها ، انا الحمد لله بعد اما ربنا هدانى ووفقنى انى اكون كويس واحضر دروس الدين مع هدى ، حبيت انصح كل زمايلى اللى بيرتكبوا الاخطاء دى زيى علشان مايقعوش فى المشاكل اللى انا وقعت فيها
هدى	احنا لما روحنا للشيخ جلال امام المسجد اللى عندنا وسألناه ، قالنا اننا ممكن نعمل مجلات حائط دينية وثقافية نفيد بيها الناس ونهذب اخلاقهم ، وقالى كمان ان احنا ممكن بعد اما نعمل الحاجات دى ننزلها عالنت وننشرها للجميع
محمد	فكرة جميلة جدا جدا بس ياترى مين اللى هيكتب مواضيع المجلات دى ما انتى عارفانى اكتر حاجة بكتبها فى موضوع التعبير هوا العنوان والباقى بنقله
ريم	ايه يابنى انت ناسى ان فيه معانا هنا كاتب مرموق ومخ ذرى
محمد	ايه ده انتى تقصدى مراد ، لاحول ولا قوة الا بالله ، وده جاله منين المخ ده
مراد	هههههههه اخرص ياض ، بص بقى احنا نقسم نفسنا ونرتب شغلنا ، انا عليا اكتبلكم المواضيع وانسقها ، وانت ياعم تاخد موضوع موضوع وتكتبه بإيدك اللى عاوزة قطعها زى لسانك ده ، وريم تعلمنا كام تصميم جميل للمجلة وتزوده بشوية لمسات فنية من بتوعها ، وهدى برضه تكتب المواضيع دى عالكمبيوتر وتنزلها عالنت وتبعتها لأصحابنا اللى معانا ايميلاتهم ، وبكده ياجماعة نقدر نفيد اصحابنا وننصحهم
هدى	وناخد بإيديهم لجنة المولى عزوجل ونفوز بأعلى المراتب فى الجنة
محمد	وكمان هنشيل الغشاوة اللى على عنيهم ونفتحها لجمال وحلاوة الدنيا والاسلام
ريم	ونبقى احنا شعاع الشمس اللى بينور ويورينا التراب اللى قدام عنينا فى الهوا ومش بنقدر نشوفه
مراد	جزاكم الله خيرا ياجماعة عالكلام الجميل ده ويلا نبتدى الشغل علشان ربنا يوفقنا الى مافيه خير الاسلام والمسلمين

	وفى الختام احب ان اضع نصب اعيننا جميعا للعبرة قول البراء ابن مالك حينما قال \" إِنَّكُمْ لَتَعْمَلُونَ أَعْمَالا هِيَ أَدَقُّ فِي أَعْيُنِكُم مِنَ الشَّعْرِ كُنَّا نَعُدُّهَا عَلَى عَهْدِ رَسُولِ اللَّهِ صَلَّى اللَّهُ عَلَيْهِ وَسَلَّمَ مِنَ الْمُوبِقَات \"

معلش بقى ياجماعة
عفرنا عليكم بالغبار ده هههههه

لا ازاي عفر علينا زي ما انت عايز
ههههههههه ما دام الغبار ده هيبقي مهم اوي كده و ممكن نستفيد منه

الله الله الله عليك يا سيمو
بجد مسرحيه جمييييييييله جدا
اعذرني بس كنت مشغوله في موضوع الجروب ده
بس انا جيت اهو وقريتها
بجد جميييييييييييييييييييييييييييييله جداااااا
ما شاء الله عليك يا ادمنا المحترم

جاااااااااااااامد
ماشاء الله عليك يا سيمو
مع انها صغيرة بس يكفى مجهودك وابداعك المتواصل
وتوصيلك لفكرة او معنى او موعظه
بجد ميرسى جداااااااااا طرح جيد جدا ويستحق التحيه

ربنا يخليكوا كلكوا يارب
وشكرا لمروركم العطر

بس كان نفسى حد بعد اما قرأ المسرحية كلها
يعرفنى اذا كان فهم العنوان ولا صعب
معلش اصلى كنت عايش فى الفترة دى مع افضل واشهر ادباء المنصورة
محمد خليل
وفؤاد حجازى
بس للأسف مالحقوش يشوفوها وكان نفسى اعرضها عليهم

ايوة انا اعتقد انى فهمت
الغبار ده اللى هوه الغشاوة اللى على عينين ناس كتير واللى مش هيشيلها الا الحاجات اللى الناس اللى زى ريم ومحمد وهدى و مراد بيعملوها
والحاجات دى فعلا بتبقى زى ضوء الشمس اللى بيورينا التراب اللى مش بنشوفه مع انه قدام عينينا طول الوقت

قصة جميلة جدااااااااااا يا سيمو ويكفى اوى ان انت اللى كاتبها باسلوبك

beautiful girl كتب:: الحاجات دى فعلا بتبقى زى ضوء الشمس اللى بيورينا التراب اللى مش بنشوفه مع انه قدام عينينا طول الوقت

يعنى اصغر فيكم هيا اللى جابتها

ربنا يبارك فيكى يابيوتى

انتى كده هتخلينى انزل اللى بعده
آدى الناس اللى بتفكر ولا بلاش ههههههههه

ههههههههههه
يعنى ما تاخدتش مقلب فيا جامد كده
انا ما عرفتش العنوان معناه ايه الا لما قريت القصة كلها
وطبعا مستنيين القصة اللى بعدها يا سيمو

هو فين باقي المسرحيه يا سيموووووووو؟؟؟؟

اقتباس :: وفى الختام
احب ان اضع نصب اعيننا جميعا للعبرة
قول البراء ابن مالك حينما قال

\" إِنَّكُمْ لَتَعْمَلُونَ
أَعْمَالا هِيَ أَدَقُّ فِي
أَعْيُنِكُم مِنَ الشَّعْرِ كُنَّا
نَعُدُّهَا عَلَى عَهْدِ
رَسُولِ
اللَّهِ صَلَّى اللَّهُ عَلَيْهِ
وَسَلَّمَ مِنَ الْمُوبِقَات \"

هوا من بين الكلام ده كله
مش باين انها خلصت ؟
ههههههههههههههههه

وشكرا لمرورك ياكيتى

ههههههههههههههههههههههه

معلش بقي النتيجه عامله عمايلها ههههههههه
انا افتكرت لسه ليها تكمله